ÜLKƏR DƏRYA : ÖLÜM YA ÖLMƏYİM

Dərdlərə yoxdursa dərman, ölüm, ya ölməyim ?

Ruh gedib, qaldı quru can ölüm, ya ölməyim ?

Mən baxıb ölənlərin ehsanına mat qalmışam,

Xərclənib küllicə " Şirvan " ölüm, ya ölməyim ?

Sərvət imiş qəbr evi, nəbadə ölmə kasıb,

Kim verər ki, sənə ehsan ölüm, ya ölməyim ?

Neynirsən mərmər evi, yaşa öz komanda sən.

Qoy yağa başına leysan, ölüm, ya ölməyim ?

Sən yaşa kasıb evində, doluya, qara tutul

Qonşu salsın geniş eyvan, ölüm, ya ölməyim ?

Kişi ağzın açmamış evdə kəsilər sözü,

Ev olub yazığa zindan ölüm, ya ölməyim ?

Ata - ana haqqı yerdə, oğullar söz dinləmir,

Gənclərin başında duman, ölüm, ya ölməyim ?

Yazanda gördüklərimi, dedilər yalandu bu,

Yazdığın böhtandır böhtan ölüm ya ölməyim ?

Başqa bir zamanda bəlkə, doğulmalıydı bu Dərya,

Mənə yaddı bax, bu dövran, ölüm,ya ölməyim ?

Çox düşündün Dərya, durma artıq sən də ver qərar.

İmzala sonunda fərman, ölüm ? Ya ölməyim ?

Ülkər Dərya