ŞƏFA VƏLİYEVA : EŞQDƏN OXUMA

Ay qırmızı papaqlı,

Ay hamıdan küsən qız…

Əlləri umacaqlı,

Boy-buxunu süsən qız…

Yenə kimə inandın?

Aldadan tapıldımı?

“Dağ haqqı”ydımı andın,

Dağlarda haqq qaldımı?

Yazdığın “son mesajla”

Hansı qarğış yol aldı?

Bir sərçə qayğısıyla

Keçmədiyin yol qaldı?

Ay qırmızı papaqlı,

Saçı daraqtanımaz…

Eşqi “başı qapazlı”,

Arzuları gülaçmaz…

Ömrün önündən çəkil,

Nə olacaq, olacaq…

İkimizdən bir şəkil,

Bir xatirə qalacaq…

Aç saçını, tök üzə,

Qocalmaqdan da qorxma…

Bir bayatı çək bizə,

Və də, eşqdən oxuma…

Şəfa Vəliyeva