ADİLƏ NƏZƏR : ÜMİDLƏRİM CAN VERİR

Azıb qaldım bir ömür,

Həyatın döngəsində.

Ümidlərim can verir,

Həsrətin pəncəsində.

Kimsə bilmədi məni,

Azam, ya çox, bilmədi.

Bu gizli dəfinədə,

Nə var, nə yox, bilmədi.

Yordum, getdim yolları,

Dörd yanım dörd bayatı.

Şeirlərə köçürdüm,

Yaşamadım həyatı.

Məni tanımayanlar

Qəlbimə tanıqdılar.

Qəmdən hali olanlar

Bağrım tək yanıqdılar.

Hansı günüm savaba,

Hansı günüm günaha?

Suallardan cavaba

Çata bilmədim daha.

Çək əlini saçıma,

Sil gözümdən yaşı da.

Qoy bu yazı da görüm,

Qoy qalım bu qışı da.

Bir ovuc gün şüası,

Düşər uçuq komadan.

Bəlkə çıxar ümidim

Elə bu qış komadan.

Adilə Nəzər